דברי הימים ב 5

¹ותשלם כל המלאכה אשר עשה שלמה לבית יהוה ויבא שלמה את קדשי דויד אביו ואת הכסף ואת הזהב ואת כל הכלים נתן באצרות בית האלהים׃

²אז יקהיל שלמה את זקני ישראל ואת כל ראשי המטות נשיאי האבות לבני ישראל אל ירושלם להעלות את ארון ברית יהוה מעיר דויד היא ציון׃

³ויקהלו אל המלך כל איש ישראל בחג הוא החדש השבעי׃

⁴ויבאו כל זקני ישראל וישאו הלוים את הארון׃

⁵ויעלו את הארון ואת אהל מועד ואת כל כלי הקדש אשר באהל העלו אתם הכהנים הלוים׃

⁶והמלך שלמה וכל עדת ישראל הנועדים עליו לפני הארון מזבחים צאן ובקר אשר לא יספרו ולא ימנו מרב׃

⁷ויביאו הכהנים את ארון ברית יהוה אל מקומו אל דביר הבית אל קדש הקדשים אל תחת כנפי הכרובים׃

⁸ויהיו הכרובים פרשים כנפים על מקום הארון ויכסו הכרובים על הארון ועל בדיו מלמעלה׃

⁹ויאריכו הבדים ויראו ראשי הבדים מן הארון על פני הדביר ולא יראו החוצה ויהי שם עד היום הזה׃

¹⁰אין בארון רק שני הלחות אשר נתן משה בחרב אשר כרת יהוה עם בני ישראל בצאתם ממצרים׃

¹¹ויהי בצאת הכהנים מן הקדש כי כל הכהנים הנמצאים התקדשו אין לשמור למחלקות׃

¹²והלוים המשררים לכלם לאסף להימן לידתון ולבניהם ולאחיהם מלבשים בוץ במצלתים ובנבלים וכנרות עמדים מזרח למזבח ועמהם כהנים למאה ועשרים מחצררים בחצצרות׃

¹³ויהי כאחד למחצצרים ולמשררים להשמיע קול אחד להלל ולהדות ליהוה וכהרים קול בחצצרות ובמצלתים ובכלי השיר ובהלל ליהוה כי טוב כי לעולם חסדו והבית מלא ענן בית יהוה׃

¹⁴ולא יכלו הכהנים לעמוד לשרת מפני הענן כי מלא כבוד יהוה את בית האלהים׃

דברי הימים ב

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

Books

בראשית · שמות · ויקרא · במדבר · דברים · יהושע · שופטים · רות · שמואל א · שמואל ב · מלכים א · מלכים ב · דברי הימים א · דברי הימים ב · עזרא · נחמיה · אסתר · איוב · תהלים · משלי · קהלת · שיר השירים · ישעיהו · ירמיהו · איכה · יחזקאל · דניאל · הושע · יואל · עמוס · עובדיה · יונה · מיכה · נחום · חבקוק · צפניה · חגי · זכריה · מלאכי · מתי · מרקוס · לוקס · יוחנן · מעשי השליחים · הרומים · הקורינתים א · הקורינתים ב · הגלטים · האפסים · הפיליפים · הקולוסים · התסלוניקים א · התסלוניקים ב · טימותיאוס א · טימותיאוס ב · טיטוס · פילימון · העברים · יעקב · פטרוס א · פטרוס ב · יוחנן א · יוחנן ב · יוחנן ג · יהודה · ההתגלות

Scrolly Bible — scroll the Bible, one verse at a time.